ކޮރޯނާ

އަހަންނަކީ ކޮރޯނާ ވައިރަހެވެ. ކަލޭމެންގެ ލޮލަށް ނުފެނި އަހަރެން މިދަނީ ކަލޭމެންގެ މުޅި ދުނިޔެ އެފުށް މިފުށަށް ޖަހަމުންނެވެ. އިންސާނާގެ ހަށިގަނޑު ތެރެއަށް ވަދެ އަހަރެން ހިންދެމިލާ ހަމަޖެހިލާއިރު ހަމަ ރެއަކާވެސް ނުލައެވެ.

ކަޅެއް ދޮނެއް ކަލޭމެނަށް ތިޔަ ވަކިވަނީ ކަލޭމެންގެ ވަރުގަދަ ހަށިގަނޑުތަކަށް އަހަރެން ހެދި އެއްޗެއް ހަދާ ނިންމާ ފަހުންނެވެ. ބޮޑާކަންމަތީ ގުންފައި ޖަހަމުން ހިނގާ އިންސާނާއެވެ! މިހާވަރުން ވެސް ކަލޭމެންގެ ނުކުޅެދުންތެރިކަން ނުވިސްނޭ ހެއްޔެވެ؟. އެންމެ ކުޑަމިނުން އަހަރެން އުފެދުނު ގޮތްވެސް ކަލޭމެން ތިޔަ އުޅެނީ ހޯދައި ނުގަނެވިގެނެވެ.

ކީރިތި ވަންތަ ﷲ ގެ ކޯފާއަކީ ކަނޑުން ހިއްލާލާ ބިޔަ ރާޅެއް އެކަންޏެއްނޫނެވެ. މިއަދު އެކަން އަހަރެން މިދަނީ ސާބިތު ކޮށްދެމުންނެވެ. ގަދަ ބަސްބުނުމުގައި ކަލޭމެން ފުކެއް ދޫނުކުރިއެވެ. ﷲ ކުރުން ހަރާމް ކުރެއްވި ކަންކަމުގައި ހައްދު ފަހަނަ އަޅައި ހިނގައްޖެއެވެ.

ޖަމަލުގެ ގޮންގަނޑުތަކެއް ފަދައިން އިސްތަށިގަނޑު ކޮޅަށްޖަހައި ބާރު ފޮތިގަޑެއް އޮޅާލެވުނީމަ އެއޮތީ އަންހެން ވެރިންނަށް ބުރުގާ އެޅިފައެވެ. ފިއްތި ހަރުވާޅުލައި ކަށިމައްޗަށް އަރުވާލުމުން އެއޮތީ ހިޖާބު ވެވިފައެވެ. މީހަކު ހެޔޮ ނަސޭހަތެއް ދީފިނަމަ ފާޑުކިޔާ މީހުނަށް ޝުކުރިއްޔާ ބުނެލުމުން އެއޮތީ އިސްލާހު ވެވިފައެވެ. ކަލޭމެން މޭ ނަގާފައި ތިޔަ ބަނޑިބަނޑި ލައްވަނީ ކާކަށް ގޮންޖަހަމުން ހެއްޔެވެ.

ނޫނެކެވެ. ކަލޭމެންގެ މަގުސަދަކީ ދުނިޔެ ފަސާދަ ކުރުމެވެ. ހަލާލު އަނބި ދަރިންނަށް މަކަރާ ހީލަތް ހަދަމުން ފިރިހެނުން އެތިބަ ދުވަނީ ކަލޭމެންގެ އުނގުން ހަރާމް ލައްޒަތު ހޯދައިގަތުމަށެވެ. އުފަލާ މަޖަލުގައި ޒިނޭ ކުރުމުގައި ހައްދުފަހަނައަޅައި ކަލޭމެން ދެޖިންސު މަސްހުނިވެ ނިމިއްޖެއެވެ. ރެއާ ދުވާލު ފަސް ފަހަރު އެގޮވާލާ ބަންގީގެ އަޑު ކަލޭމެންގެ ކަންފަތަކަށް ނުފޯރައެވެ.

މިހާވަރުން ކަލޭމެންގެ ޖާހިލުކަން ނިމުނީއަކީ ނޫނެެވެ. ތުބުޅިއާއި ނިގާބަކީ ކަލޭމެންގެ މުޑުދާރު އަމަލުތަށް ފޮރުވަން ބޭނުން ކުރާ ހަތިޔާރަކަށް ވެސް ކަލޭމެން ތިތިބީ ހަދައިގެނެވެ. ހަރާމްކުރެއްވި ބަނގުރަލާ އޭތި މީތި ބޮއެގެން ކަލޭމެންގެ ވަހުޝީކަމުގެ ދަލުގައި ތަނެއް ދޮރެއް ވަކިނުވާ ތުއްތު ޅަދަރިން ޖައްސައި ޝިކާރަ ކުރަމުން ތިޔަ ދާދިޔުން ހެކިކޮށްދެނީ ކަލޭމެން ބިރު ފަހަނަ އަޅާ ގޮސްފައި ތިބިވަރެވެ.

ލޯތަަކަަށް ސިއްރުން އިންޓަނެޓުން ތިޔަ ބަލާހާ މުޑުދާރު މަންޒަރުތަށް ކަލޭމެން ހެއްދެވި ފަރާތަށްވެސް ވަންހަނާވެފައި އޮވެދާނޭ ކަލޭމެނަށް ހަމަ ހީވަނީ ހެއްޔެވެ؟. ކައިބޮއެ ހެދުމުގައި ވެސް ކަލޭމެން ހަރާމެއް ހަލާލެއް ބެލުމެއްނެތެވެ. އަލިފާން ކެވުނަސް ވަރިހަމަ ވެއްޖެއެވެ. ހައްގު ބަސް އިއްވަން ތިބި އިއްޒަތް ތެރިން ފައިސާއަށް ވިކި ނިމިއްޖެއެވެ.

ﷲ އަށް ޝިރުކު ކުރުމާއި ކީރިތި ރަސޫލާއަށް ޖޯކުޖަހައި ބަދުބަސް ބުނުމުގައި ވެސް އެތައް ބަޔަކު ހައްދުފަހަނަ އަޅައިގޮސްސިއެވެ. މުސްލިމުންނަށް ހިތުހުރި އަނިޔާ ދެމުންދިޔަ ކާފަރުންގެ ހިޔަނި މަތިން ހިނގަމުން ކަލޭމެން ދުވަނީ އެެއީ ކިހާ ގަދަފަދަ ބައެއް ކަމަށް ހެއްޔެވެ. އެމީހުންގެ ގާބިލުކަން ހުރިވަރު މިއަދު އެއޮތީ ފެންނާށެވެ. ހޭބޯ ނާރައި އެމީހުން އެހޯދަނީ އަހަރެން މިބިމުން ފޮހެލާނެ ހަތިޔާރެކެވެ.

އެންމެ ތިންމަސް ދުވަހުން އެ ބައިގަނޑު ހަފުސްވެއްޖެއެވެ. ގަދަ ފަދަ ވަންތަ ﷲ ގެ އިރަދަފުޅާ ނުމެލާ ނިކަން އަހަރެން މަރާލާނެ ހަތިޔާރެއް ހޯދަ ބަލާށެވެ. ހަމަ ހިލާ އެއީ ވާނެ ކަމެއްނޫނެވެ.
ﷲ އަށް ބިރުވެތިވެ ތައުބާވުމަށް ވުރެ މޮޅު ގޮތެއް ދެން ނިކަން ބުނެބަލާށެވެ. އަހަރެން ފަދަ ކުޑަކުޑަ މަހުލޫގެއް މިދުނިޔެއިން ފޮހެލުމަށް ނުކުޅެދިފައި ތިބި ބަޔަކު ފަސްބައިގަ އެލިގެން ތިބުމުން ދޭހަވަނީ ކަލޭމެންގެ ސިކުނޑީގެ އުނިކަން ނޫން ދެން ކޮންކަމެއް ހެއްޔެވެ. ވިސްނާށެވެ.

( އުންމު ކައިފް )